Stórleikur í handboltanum: Selfoss mætir í heimsókn

Topplið Selfossar kemur í heimsókn til okkar á morgun þriðjudaginn 9. febrúar kl. 19.30 í Austurbergi.

Sellfoss er í 1. sæti deildarinnar með 20 stig eftir 11 leiki og við erum með 10 stig eftir jafnmarga leiki. Frítt er inn á leikinn og hvetjum við ÍR nær og fjær til að mæta og styðja okkar menn til sigurs á móti toppliðinu.

Áfram ÍR!

ÍR-ingar með 10 Íslandsmeistaratitla á MÍ innanhúss í frjálsíþróttum og Íslandsmeistarar félagsliða.

ÍR varði titil sinn sem Íslandsmeistarar félagsliða á Meistaramóti Íslands innanhúss um helgina. Á síðari degi mótsins unnust fjórir titlar í einstaklingsgreinum, Arna Stefanía Guðmundsdóttir í 200 m hlaupi, Fanney Björk Tryggvadóttir í stangarstökki, Jóhann Ingadóttir í þrístökki og Snorri Sigurðsson í 800 m hlaupi. Þá vann ÍR sigur í 4x400 m boðhlaupi karla og kvenna. Nánar á síðu frjálsíþróttadeildar.

ÍR mætir Grindavík í undanúrslitum Subway bikarkeppninnar

Nú er að koma að undanúrslitaleik ÍR og Grindavíkur í Bikarkeppni Subway og KKÍ, en leikurinn fer fram í Grindavík á mánudagskvöld (8. febrúar) kl 19:15.  Þá kemur í ljós hvort liðið mætir Snæfelli í úrslitaleiknum í Laugardalshöll síðar í mánuðinum.  Það er deginum ljósara að ÍR-ingar munu mæta dýrvitlausir til leiksins í Grindavík, eftir fremur rysjótt gengi í Iceland Express deildinni í síðustu leikjum.  Allir eru heilir og klárir í leikinn og full ástæða er til að hvetja stuðningsmenn til að fjölmenna á leikinn og styðja strákana.  Bikarleikir eru gjarnan mjög skemmtilegir og spennandi, þar sem allt er undir og allt getur gerst.  Áfram ÍR!

Fjórir ÍR-ingar Íslandsmeistarar á fyrri degi MÍ innanhúss. ÍR með örugga forystu í stigakeppninni.

Jóhanna Ingadóttir varð Íslandsmeistari í langstökki með 5,82 m, Fríða Rún Þórðardóttir í 1500 m hlaupi á 4:36,29 sek., Helga Þráinsdóttir í hástökki með 1,64 m og  Snorri Sigurðsson í 400 m hlaupi á 50:44 sek. Í fyrra unnu ÍR-ingar alls 3 titla og er þetta því mjög góð uppskera á fyrri degi. Margir fleiri stóðu  stóðu sig vel og má búast við enn fleiri titlum á síðari degi mótsins. Í stigakeppninni er ÍR með örugga forystu og er langt í næsta lið, Breiðablik. Arna Stefanía Guðmundsdóttir og Aníta Hinriksdóttir settu aldursflokkamet í sínum greinum. Nánari umfjöllun á síðu frjálsíþróttadeildar.

Góður útisigur á Fjölni

ÍR strákarnir mættu Fjölni í Grafarvogi í kvöld og innbyrðu góðan sigur, 29 - 24. Okkar menn leiddu mestallan leikinn mjög svo einbeittir á verkefni dagsins. Í upphafi leiks skiptust liðin á að skora en við náðum nokkurra marka forustu sem við náðum að auka um miðjan hálfleikinn og leiddum við með 5 mörkum í hálfleik 11-16. Fjölnismenn börðust allan tíman fyrir sínu og gáfu sér góðan tíma í sóknina. Við náðum að halda dampi þrátt fyrir aukin tæknimistök í seinni hálfleik. Leikurinn endaði með 5 marka sigri 24-29.

Nýr þjálfari meistaraflokks karla

Viggó Sigurðsson hefur verið ráðinn þjálfari meistaraflokks karla í handbolta hjá ÍR. Stjórn deildarinnar er mjög ánægð með að hafa fengið Viggó til liðs við félagið en Viggó er sem kunnugt er þaulreyndur þjálfari og kemur eflaust til með að geta miðlað af reynslunni sinni til leikmanna félagsins.
Við bjóðum Viggó velkominn til starfa hjá okkur.

Stjórn Handknattleiksdeildar ÍR.

Frístundakortið og greiðsluseðlar hjá ÍR

Núna hafa greiðsluseðlar verið sendir út fyrir handboltadeild, knattspyrnudeild, körfuboltadeild, júdódeild og keiludeild og eru á gjalddaga/eindaga 5. febrúar.
Dansdeild, frjálsar, skíðadeild og Tae kwon do deild eru ennþá með opið í Frístundakortinu næstu vikuna og greiðsluseðlar verða sendir út fyrir næstu mánaðarmót á gjalddaga/eindaga 1. mars.

Auglýst hefur verið í tölvupósti til allra deilda og flokka með fyrirkomulag innheimtu vorannar frá því í desember og ætti því ekki að koma á óvart lokun Frístundakorts og greiðsluseðlar.

Þótt Frístundakortið sé lokað í Rafrænni Reykjavík þá er ekki of seint að ráðstafa styrknum því aðeins þarf eitt símtal við mig og málið er leyst.
Þá er sjálfsagt að skipta greiðslum á kreditkort sé þess óskað.
Þau börn sem koma í félagið eftir að greiðsluseðlar fara út eru sett í Frístundakortið um leið og þau eru skráð, og fyrir annarlok sendi ég  greiðsluseðla á þau börn sem nýta það ekki.

Með kærri þökk.

Elfa á skrifstofunni
s. 587 7090.

ÍR-ingar Íslandsmeistarar félagsliða í frjálsum 15 til 22 ára 7. árið í röð

Ungmenna lið ÍR í frjálsum hrósaði sigri í heildarstigakeppni Meistaramóts Íslands 15-22 ára í frjálsum íþróttum innanhúss sjöunda árið í röð. Liðið vann stigakeppnina í öllum flokkum nema einum og heildarkeppnina með miklum yfirburðum. Til hamingju með frábæran árnangur. Nánar á heimasíðu Frjálsíþróttadeildar ÍR

Unglingadómaranámskeið knattspyrnudeildar ÍR 2010.

 

Kæru foreldrar/forráðamenn/iðkendur og velunnarar.

 

Fimmtudaginn 11.febrúar verður hið árlega unglingadómaranámskeið KSÍ og ÍR haldið í ÍR-heimilinu kl 19:00. Allir áhugasamir foreldar, iðkendur og félagsmenn eldri en 15.ára sem hafa áhuga á dómarastörfum og vilja gefa kost á sér til að dæma fyrir félagið í yngriflokkum félagsins eru hvattir til að skrá sig á námskeiðið.

Meistaramót Íslands í frjálsum íþróttum 15 til 22 ára innanhúss um helgina

Meistaramót Íslands 15-22 ára fer fram um helgina í Laugardalshöllinni en ÍR sendir 60 öfluga íþróttamenn til leiks. ÍR-ingar eiga titil að verja á þessu móti en 6 undanfarin ár hefur lið ÍR unnið titilinn Íslandsmeistari félagsliða 15 til 22 ára í frjálsum íþróttum.